Bu gün Azərbaycan Basketbol Liqasında pley-off mərhələsinin ikinci oyunlarına start veriləcək. Günün açılış qarşılaşması Gəncədə baş tutacaq. Yerli "Gəncə” komandası doğma azarkeşləri önündə "Şəki”ni qəbul edəcək.

Görüş Gəncə İdman Sarayında keçiriləcək və saat 14:00-da başlayacaq. Seriyanın ilk oyununda "Şəki” komandası rəqibinə cəmi bir xal fərqi ilə qalib gəlmişdi – 85:84. Bu səbəbdən bugünkü qarşılaşma "Gəncə” üçün son dərəcə vacib əhəmiyyət daşıyır. Qələbə qazanmaları halında seriyada bərabərlik bərpa olunacaq və cütün taleyi həlledici matçda müəyyənləşəcək.

Cütün qalibi yarımfinalda "Sabah” – "Sərhədçi” qarşılaşmasının qalibi ilə üz-üzə gələcək.

Qeyd edək ki, pley-off mərhələsinin ikinci oyunlarına aprelin 22-də yekun vurulacaq. Mərhələnin formatına əsasən, komandalar seriyada iki qələbə qazanmaqla növbəti mərhələyə yüksəlirlər.