"Mançester Sit"nin əfsanəvi futbolçusu Kevin de Bruyne, komandadan ayrılacağını rəsmi şəkildə açıqlayıb. Belçikalı yarımmüdafiəçi, sosial media hesablarında yaydığı açıqlama ilə azarkeşlərə və klubuna duyğusal bir vidalaşma mesajı göndərib.

De Bruyne açıqlamasında bunları qeyd edib: "Hörmətli Mançester, Bu mesajı görəndə yəqin ki, mövzunun nədən getdiyini başa düşürsünüz. Ona görə də birbaşa mövzuya keçəcəyəm və hamınıza bildirəcəyəm ki, bu, mənim "Mançester Siti" oyunçusu kimi son aylarım olacaq.

Bu barədə nəsə yazmaq asan deyil, amma futbolçular olaraq hamımız bilirik ki, bu gün sonunda gələcək. O gün gəldi və siz bunu ilk məndən eşitməyə layiqsiniz.

Futbol məni hamınıza və bu şəhərə gətirdi, xəyalımın arxasınca qaçdım, bu dövrün həyatımı dəyişəcəyini bilmədim. Bu şəhər, bu klub, bu insanlar... mənə hər şeyi verdilər. Hər şeyi geri verməkdən başqa çarəm yox idi! Və təxmin edin, biz hər şeyi qazandıq.

İstəsək də, istəməsək də vidalaşmağın vaxtıdır. Suri, Roma, Mason, Mişel və mən bu yerin ailəmiz üçün nə demək olduğuna görə çox minnətdarıq. "Mançester" uşaqlarımızın pasportlarında əbədi olaraq qalacaq və daha da önəmlisi hər birimizin qəlbində qalacaq.

Bura həmişə bizim evimiz olacaq.

Şəhərə, kluba, heyətə, komanda yoldaşlarına, dostlara və ailəyə bu 10 illik macəra üçün nə qədər təşəkkür etsək azdır.

Hər hekayə sona çatır, amma bu, şübhəsiz ki, ən yaxşı fəsil oldu. Gəlin bu son anları birlikdə keçirək!"

Kevin de Bruynenin "Mançester Siti" karyerası boyunca qazandığı uğurlar unudulmazdır. 2015-ci ildə "Volfsburq"dan transfer olunan futbolçu 10 il ərzində "şəhərlilər"in heyətində İngiltərə və Avropa futbolunda iz qoyub. Komanda ilə birlikdə Premyer Liqa çempionluqları, İngiltərə kubokları və Çempionlar Liqası titulu qazanan ulduz futbolçu "Mançester Siti" klubunun ən dəyərli oyunçularından biri kimi tarixə düşüb.