İdman 11:34 / 03.04.2025
Aprelin 23-27-də Monteneqronun paytaxtı Podqoritsa şəhərində böyüklər arasında cüdo üzrə Avropa çempionatı keçiriləcək. Azərbaycan Cüdo Federasiyasının mətbuat xidmətindən verilən məlumata görə, qitə çempionatının fərdi yarışlarında Azərbaycanı 12 çəki dərəcəsində ümumilikdə 16 cüdoçu (9 kişi, 7 qadın) təmsil edəcək.
Azərbaycan Avropa çempionatları tarixində ilk dəfə böyüklər arasında qarışıq komanda yarışında da iştirak edəcək. Həmçinin, Olimpiya çempionlarımız Hidayət Heydərov və Zelim Kotsoyev Paris Olimpiadasından sonra ilk dəfə tatami üzərinə çıxacaqlar.
Yarışda kişi cüdoçulardan Əhməd Yusifov, Turan Bayramov (hər ikisi 60 kq), Ruslan Paşayev (66 kq), Hidayət Heydərov (73 kq), Zelim Tçkayev, Ömər Rəcəbli (hər ikisi 81 kq), Zelim Kotsoyev (100 kq), Uşanqi Kokauri (+100 kq) iştirak edəcək. Kişilər arasında 90 kq çəki dərəcəsində Azərbaycanı təmsil edəcək cüdoçular Dubrovnikdə keçiriləcək Avropa Kubokundan sonra müəyyənləşəcək.Vüsal Qələndərzadə isə 73 kq çəki dərəcəsində qarışıq komanda yarışlarında heyətə qoşulacaq.
Qadın cüdoçuların yarışında isə komandamız Könül Əliyeva (48 kq), Aydan Vəliyeva,Gültac Məmmədəliyeva (hər ikisi 52 kq), Fidan Əlizadə (57 kq), Günel Həsənli, Südabə Ağayeva (hər ikisi 70 kq) və Nigar Süleymanova (78 kq) ilə təmsil olunacaq. Milli komandanın üzvləri performans direktor və böyüklərdən ibarət yığmanın baş məşqçisi Riçard Trautman, böyük məşqçilər Elçin İsmayılov, Robert Kravçik və Slavko Tekiç, qadınlardan ibarət yığmanın baş məşqçisi Amina Abdullatif və məşqçi Saşa Herkenrat-Vimarın rəhbərliyi ilə tatamiyə çıxacaqlar.
382 oxunub
