İdman 22:02 / 24.08.2024
Gələn il Azərbaycanda MDB ölkələri arasında kamandan oxatma yarışı keçirməyi planlaşdırırıq. Yarışlar Xankəndi şəhərində təşkil ediləcək. Bu idman növünün işğaldan azad olunmuş Qarabağa gəlişi rəmzi hadisədir.
Bu sözləri Azərbaycan Kamandan Oxatma Federasiyasının (AKOF) prezidenti Anar Quliyev kamandan oxatma üzrə Azərbaycan birinciliyi və çempionatının açılış mərasimindən sonra jurnalistlərə müsahibəsində deyib.
Federasiya rəhbəri AKOF-un qarşısında duran əsas hədəfləri açıqlayıb: "Hazırda məqsədimiz klubların sayını artırmaqdır. Çünki ölkəmizdə bu idman növü üzrə yaxşı potensial görünür. Əsas hədəfimiz kamandan oxatmanı yaşatmaq və inkişaf etdirməkdir. Buna görə də idmançılarımızın yaxşı nəticələr əldə etməsi üçün yüksək şərait yaradacağıq. Bu gün ölkəmizdə kamandan oxatmada təşkilatlanma bəlkə də yaxşı səviyyədə deyil. Amma istəyirik ki, Bakı ilə yanaşı, regionlarımızda da inkişafı təmin edək”.
3306 oxunub
