İdman 15:39 / 05.04.2024
Bakıda güləş üzrə Avropa Olimpiya Təsnifat turniri keçirilir. İlk yarış günündə gündə yunan-Roma güləşçiləri mübarizəyə başlayıblar. Turnirin birinci günündə Azərbaycanın 4 pəhləvanı xalça üzərinə çıxıb.
Yarışda 87 kq çəki dərəcəsində mübarizəyə başlayan İslam Abbasov ilk görüşdə danimarkalı Turpal Bisultanovla üz-üzə gəlib. Qarşılaşmadan 3:5 hesabı ilə məğlub ayrılan pəhləvanımız mübarizəni dayandırıb.
Digər təmsilçilərimiz Nihat Məmmədli (60 kq) 1/8 finalda Ukrayna güləşçisi Aleksey Masikini mübarizədən kənarlaşdırıb. O, rəqibini 5:2 hesabı ilə üstələsə də, növbəti mərhələdə qələbənin ardını gətirə bilməyib. Belə ki, güləşçimiz 1/4 finalda türkiyəli Eneş Başara məğlub olaraq (1:3) mübarizəni dayandırıb.
97 kq çəki dərəcəsində qüvvəsini sınayan Murad Əhmədiyev də turnirlə vidalaşıb. Mübarizəyə 1/8 finaldan başlayan idmançımız Aleksandar Styepanetiçdən (İsveç) güclü olub. O, rəqibini vaxtından əvvəl üstələyib - 10:0. Təəssüf ki, güləşçimiz 1/4 finalda Almaniya təmsilçisi Lukas Aleksandros Lazoqianisə məğlub olub - 5:7.
Xatırladaq ki, yarışda 130 kq çəki dərəcəsində mübarizə aparan Beka Kandelaki müvafiq olaraq Norveç və Bolqarıstan güləşçilərinə qalib gələrək yarımfinala yükəlib. İdmançımız Paris-2024-ə vəsiqə uğrunda Sergey Semyonovla (AİN) üz-üzə gələcək.
Turnirdə hər çəki dərəcəsində finala yüksələcək iki güləşçi Paris-2024 Yay Olimpiya Oyunlarına vəsiqə qazanacaq.
1713 oxunub
.jpg)
