.jpg)
.jpg)
İdman 22:15 / 26.04.2023
Futbol üzrə Azərbaycan Kubokunda ilk finalçının adına aydınlıq gəlib. Yarımfinal mərhələsində "Turan Tovuz”u üstələyən "Neftçi” tarixində 11-ci dəfə həlledici görüşdə iştirak etmək hüququ qazanıb.
Bir həftə əvvəl Tovuzda 0:1 hesabı ilə məğlub olan "ağ-qaralar” doğma azarkeşlər önündə keçirdiyi cavab matçının son dəqiqələrində vurduğu iki cavabsız qol sayəsində qələbə qazanaraq finala yüksəlib.
Paytaxt təmsilçisi görüşün ilk dəqiqələrində rəqibin qapısına yol tapsa da, VAR-ın müdaxiləsindən sonra qol hesaba alınmayıb.Bakılıların birinci hissədəki cəhdləri nəticə verməyib. Tovuz təmsilçisi son dəqiqələrə qədər rəqibin təzyiqinə tab gətirməyi bacarıb. Hətta "Neftçi"nin daha bir qolu baş hakimin epizoda VAR-da baxmasından sonra ləğv edilib.
Buna baxmayaraq, paytaxt klubu matça əlavə edilmiş dəqiqələrdə ardıcıl iki dəfə fərqlənib. Əvvəlcə 90+3-cü dəqiqədə Emin Mahmudov cərimə zərbəsini dəqiq yerinə yetirib. Beş dəqiqə sonra isə Kenni Sayef "Neftçi"ni finala daşıyan qola imza atıb.
Bakı klubunun finaldakı rəqibi aprelin 27-də baş tutacaq "Səbail" – "Qəbələ" görüşündə müəyyənləşəcək. Bu komandaların Qəbələdəki ilk duelində eyniadlı komanda 3:2 hesablı qələbə qazanıb.
Qeyd edək ki, Azərbaycan Kubokunun final görüşü iyunun 3-də "Bakcell Arena"da təşkil olunacaq.
21623 oxunub
.jpg)
