XƏBƏR LENTİ
24 Aprel 2024
23 Aprel 2024
22 Aprel 2024
21 Aprel 2024



2 boksçumuz Qızıl kəmər seriyasında yarımfinala vəsiqə qazandı
İdman 12:36 / 06.02.2023
Azərbaycanın 2 boksçusu Mərakeşdə Qızıl kəmər seriyası çərçivəsində keçirilən turnirdə yarımfinala yüksəlib. 67 kq-da Nəbi İsgəndərov və 71 kq-da Sərxan Əliyev ən güclü 4 boksçu arasına düşməklə bürünc medalı təmin ediblər.

İsgəndərov Atomani Baroufun (Komor adaları) ardınca 1/4 finalda Selbi Dlamini Tabisoya (Esvatini) da qalib gəlib. Avropa çempionatının mükafatçısı yenə 5:0 (30:26, 30:27, 30:25, 30:26, 29:28) hesablı qələbə sayəsində mərhələ adlayıb. O, yarımfinalda Abdulhakim Akramla (Seyşel adaları) münasibətinə aydınlıq gətirəcək.

Əliyev Sarohatua Lumbantobinqin (İndoneziya) ardınca Alimami Kristian Toması (Sierra Leone) da məğlub edib - 5:0 (30:26, 30:27, 30:27, 30:27, 30:26). Dünya çempionatının bürünc medalçısı finala vəsiqə uğrunda Stiv Kulenquluka (Konqo Demokratik Respublikası) ilə qüvvəsini sınayacaq.

Digər boksçulardan Tayfur Əliyev (60 kq) Vsevolod Şumkovla (Rusiya), Məhəmməd Abdullayev (+92 kq) Dieqo Lensi (İtaliya) ilə qarşılaşıb. Rəqiblər mərhələ adladığından Azərbaycan təmsilçiləri 5-ci yeri tutublar. Bu mövqe onların hərəsinə 400 reytinq xalı qazandırıb.

Qeyd edək ki, yarışın 5-ci günündə 1/4 final mərhələsində yığmanın daha 3 üzvü rinqə çıxacaq. Məsud Yusifzadə (51 kq) Duqlas Trindadeni (Braziliya), Ümid Rüstəmov (57 kq) Jan Kaysedonu (Ekvador) və Malik Həsənov (63,5 kq) Qabil Məmmədovu (Rusiya) sınağa çəkəcək.


11567 oxunub

InvestAZ