İdman 00:20 / 04.12.2023
Kişi voleybolçular arasında Azərbaycan çempionatında növbəti oyunlar keçirilib. "Murov Az Terminal” Yüksək Liqanın debütantı "Xarı Bülbül Laçın” komandası ilə üz-üzə gəlib.
Gənclər və İdman Nazirliyinin Voleybol Mərkəzində təşkil olunan matç gərginliyi ilə yadda qalıb. Komandaların hərəsi iki set qazandığından qalib tay-brekdə müəyyən olunub. Bu hissədə daha dəqiq oynayan "Murov Az Terminal” görüşün qalibi olub.
GİN-in Voleybol Mərkəzində təşkil olunan növbəti görüşdə "Neftçi” və "Xarı Bülbül Şuşa” klubları üz-üzə gəlib.
Ölkəmizi avrokubokda təmsil etmiş "Xarı Bülbül Şuşa” çempionatdakı ilk qarşılaşmasına yaxşı başlayıb və birinci seti 25:21 hesabı ilə aktivinə yazıb. Gərgin keçən ikinci hissədə isə "Neftçi” 27:25 hesabı ilə üstün olub. Şuşa təmsilçisi yenidən təşəbbüsü ələ keçirərək növbəti setləri də qalib başa vurub - 25:15, 25:18. Beləliklə, "Xarı Bülbül Şuşa” 3:1 hesablı qələbə ilə həm də çempionatda ilk xallarını qazanıb.
Qeyd edək ki, turnir cədvəlinə 8 xalla "Azərreyl” başçılıq edir. "Murov Az Terminal” 5 xalla ikinci, hərəyə 4 xal toplamış "Neftçi” və "Xarı Bülbül Laçın” klubları üçüncü və dördüncü yerləri bölüşürlər. 3 xalı olan "Xarı Bülbül Şuşa” 5-ci, keçirdiyi bütün oyunlarda məğlub olan MOİK isə sonuncu pillədə qərarlaşıb.
15242 oxunub
