"Cüdo Klub 2012” İctimai Birliyi 2024-cü ilin yekunlarına dair tədbir keçirib. "Judo Club 2012"dən verilən məlumata görə, paytaxtın tanınmış ictimai məkanlarından olan "Mangal Steak House - Bayıl” restoranının "Bakı” zalında təşkil olunan tədbirdə Azərbaycan Cüdo Federasiyası (ACF) prezidentinin müşaviri Natiq Bağırov, federasiyasının baş katibinin müavini Kamran Talıbov, ACF-in İcraiyyə Komitəsinin üzvü, Azərbaycan Cüdo Veteranları Assosiasiyasının prezidenti, "Cüdo Klub 2012” İctimai Birliyinin sədri və klubun təsisçisi Azər Əsgərov, klubun rəhbərliyi, idmançıları və məşqçilər heyəti iştirak ediblər.

Mərasimin aparıcısı Əməkdar bədən tərbiyəsi və idman xadimi, "Şöhrət” ordenli Tərlan Həsənov tədbir iştirakçılarını salamlayaraq, ötən ilin cüdo ailəsi üçün uğurla yadda qaldığını və bu nailiyyətlərdə "Judo Club 2012”nin idmançılarının da payının olduğunu vurğulayıb.

Ardınca "Judo Club 2012”nin icraçı direktoru, Olimpiya dərəcəli hakim Fariz Hüseynov hesabat xarakterli çıxış edib. Klub rəsmisi qeyd edib ki, 2024-cü ildə "Judo Club 2012”nin idmançıları cüdo, karate və akrobatika idman növləri üzrə müxtəlif səviyyəli yarışlarda ümumilikdə 41-i qızıl, 28-i gümüş və 47-i bürünc olmaqla 116 medal qazanıblar. O da qeyd olunub ki, medalların əksəriyyəti - 101-i (34 qızıl, 22 gümüş, 45 bürünc) cüdoçuların payına düşüb. Fariz Hüseynov çıxışında ötən il dünyanın ən mötəbər idman tədbirində - Paris-2024 Yay Olimpiya Oyunlarında Azərbaycan komandasının 7 medal qazandığını, bu meallardan 2-sinin qızıl olduğunu, həmin qızıl medalları da ölkəmizə məhz cüdoçularımız Hidayət Heydərovun və "Judo Club 2012”nin üzvü Zelim Kotsoyevin gətirdiklərini xüsusi qeyd edib.

"2024-cü ili "Judo Club 2012” üçün uğurlu hesab etmək olar. Azərbaycan Cüdo Federasiyasının dəstəyi ilə klub ölkəmizdə cüdonun inkişafında öz layiqli töhfələrini verir. Klubumuzun qazandığı uğurların təməlində ölkə rəhbərliyinin, Azərbaycan Cüdo Federasiyasının və Azərbaycan Cüdo Veteranları Assosiasiyasının prezidenti, klubun təsisçisi Azər Əsgərovun diqqət və qayğısı dayanır. Daim yeni hədəfləri və yüksək zirvələri qarşısına məqsəd qoyan "Judo Club 2012” klubu 2025-ci ildə də öz ənənələrinə sadiq qalaraq idman nailiyyətlərini daha da artırmağa və azarkeşlərini parlaq qələbələri ilə sevindirməyə çalışacaq”, - deyə Fariz Hüseynov çıxışının sonunda qeyd edib.

Azərbaycan Cüdo Federasiyası prezidentinin müşaviri Natiq Bağırov isə çıxışında federasiya ilə klubun sıx əlaqələrindən danışaraq "Judo Club 2012”nin ölkədə aparıcı idman klublarından biri olduğunu bildirib.

O, həmçinin bu günlərdə keçirilən cüdo üzrə 18 yaşadək yeniyetmələr arasında ölkə birinciliyində "Judo Club 2012”nin həm oğlanlar, həm də qızlardan ibarət komandalarının çempion olaraq qızıl dubl etdiyini diqqətə çatdıraraq klubun rəhbərliyini və idmançıları təbrik edib.

Sonra "Judo Club 2012”nin cüdo bölməsi üzrə baş məşqçisi İlqar Müşkiyev, klubun qadınlardan ibarət komandasının baş məşqçisi Kifayət Qasımova və perspektivli idmançı Hüseyn Allahyarov çıxış edərək yaradılan şəraitə, diqqət və qayğıya görə klubun təsisçisi Azər Əsgərova minnətdarlıqlarını bildiriblər.

Çıxışlardan sonra il ərzində fərqlənən klubun bir qrup üzvünə 2024-cü ildə əldə etdiyi yüksək idman nailiyyətlərinə görə "Cüdo Klub 2012” İctimai Birliyi tərəfindən fəxri fərmanlar təqdim edilib.

Xatirə şəkli çəkdirildikdən sonra tədbir bədii hissə ilə davam edib.